पुण्याच्या ऐतिहासिक संस्कृतीचा अभेद्य मानबिंदू
लोकमान्य टिळकांनी सार्वजनिक गणेशोत्सवाची सुरुवात केल्यानंतर पुण्यातील शुक्रवार पेठेतील नातूबाग परिसरात स्थानिक नागरिकांनी एकत्र येऊन बाजीराव रोड नातूबाग मंडळाची स्थापना केली. तेव्हापासून आजपर्यंत मंडळाने धार्मिक परंपरेसोबतच सामाजिक ऐक्य व प्रबोधनाचा वसा जपला आहे.
मंडळाचा श्री गणपती 'पुण्याचा अधिपती' म्हणून ओळखला जातो. गणेशोत्सवातील नयनरम्य देखावे, भव्य मिरवणूक आणि वर्षभर चालणारे सामाजिक उपक्रम यामुळे नातूबाग मंडळ संपूर्ण महाराष्ट्रात प्रसिद्ध आहे.
महाराष्ट्राच्या समृद्ध सांस्कृतिक वारशाचे व गणेशोत्सवाच्या पवित्र परंपरेचे जतन करणे आणि समाजातील सर्व घटकांना एकत्र आणून एकात्मता व बंधुभाव वृद्धिंगत करणे.
केवळ सण-उत्सव साजरे न करता आरोग्य, शिक्षण, पर्यावरण संवर्धन आणि आपत्कालीन मदतीच्या माध्यमातून एक समर्थ व सक्षम समाज घडवणे.
मन खंबीर करणे, समाजात संतोषी वृत्ती जोपासणे आणि सामाजिक बांधिलकी, बंधुभाव व आरोग्य वृद्धिंगत करणे या उदात्त हेतूने 'बाजीराव रोड नातूबाग मंडळ' कार्यरत आहे.
पुणे गणेशोत्सवाचे 'प्रवेशद्वार' म्हणून नावारूपास आलेले हे मंडळ परंपरेसोबतच आधुनिकतेची सुरेख सांगड घालत सामाजिक उत्तरदायित्व जपण्यासाठी सदैव कटिबद्ध राहिले आहे.
संगीताच्या तालावर ठेका धरणारी अप्रतिम विद्युत रोषणाई हे मंडळाचे मुख्य आकर्षण आहे. पुणे गणेशोत्सवात सर्वप्रथम एलईडी (LED) आणि पिक्सेल बल्बचा प्रभावी वापर करून रोषणाईचे एक देखणे दालन मंडळाने उभे केले.
उत्सवादरम्यान रस्त्यांचे नुकसान टाळण्यासाठी श्री. गोखले यांच्या सहकार्याने 'खड्डेविरहित मंडप' साकारण्यात मंडळ शहरात अग्रेसर ठरले आहे.
बाजीराव रस्त्यावरील वाहतूक कोंडी टाळण्यासाठी मंडळाचे स्वयंसेवक पोलिसांना सहकार्य करतात. तसेच वाहनांची वर्दळ विनाअडथळा सुरू राहावी यासाठी अभिनव 'हँगिंग मंडप' संकल्पना राबवण्यात आली.
मंडळाचे स्वतंत्र युट्यूब चॅनेल आणि फेसबुक पेज कार्यरत असून, त्याद्वारे जगभरातील गणेशभक्तांपर्यंत विविध उपक्रमांची माहिती पोहोचवली जाते.
